Проект за унапредување на дигиталната писменост во Република Македонија - Национален MOS (Microsoft Office Specialist)
Скопје, 21 декември 2017 година
Министерот за информатичко општество и администрација Дамјан Манчевски се обрати на настанот со кој се најави започнувањето на проектот за унапредување на дигиталната писменост во Република Македонија - Национален MOS (Microsoft Office Specialist) натпревар.
„Наша цел како влада, а во овој контекст ја имаме и поддршката од индустријата и бизнисот, е кај младите да ја промовираме ИКТ индустријата и ИКТ знаењето, како еден од главните начини со кои ќе можат да си обезбедат подостоинствен живот во Македонија“, рече министерот Манчевски. Тој посочи дека од една страна постои недостиг од ИТ кадар во целата индустрија, а од друга, голема побарувачка.
Потенцирајќи ја разликата меѓу формалното образование и имањето дигитална писменост, министерот Манчевски ја нагласи важноста од доделувањето на сертификати од страна на ИТ компаниите како што е Микрософт, со цел доквалификација и преквалификација на кадрите.
На тој начин, како што рече министерот Манчевски, голем дел од кадрите кои немаат дигитална писменост, брзо ќе бидат трансформирани во ИКТ кадри, со што ќе бидат достапни на пазарот на трудот.
Натпреварот започнува утре, а ќе трае до 30 мај кога ќе се оддржи големото финале. Организатори се Certiadria, со поддршка од Министерството за информатичко општество и администрација, Град Скопје, Општина Центар, Општина Карпош и голем број компании и институции.
Инаку, на настанот своите искуства ги споделија победниците од претходните натпревари кои учествуваа на меѓународниот Microsoft натпревар во САД – Марко Марковиќ и Драгана Јакимова.
Министерство за информатичко општество и администрација
