MK) [1]

Дигитализацијата на услугите и регистрите е стратешка цел на владата на Република Северна Македонија. Во таа насока е и проектот во тек „Зајакнување на е-влада“ (Enhancing e-government, EuropeAid/140244/DH/SER/MK), финансиран од програмата ИПА 2017, а чија имплементација започна во третиот квартал 2020 година.

Целта на проектот е да се зголеми бројот на достапни електронски услуги на Националниот портал за електронски услуги (uslugi.gov.mk), како за граѓаните, така и за правните лица. Во рамки на проектот се планира дигитализација на услуги и дигитализација на регистрите потребни за услугите. Главни придобивки ќе бидат кратењето на времето за испорака на услугите и зголемување на квалитетот на електронските услуги.

Главни корисници и партнери во имплементација на проектот се Министерството за информатичко општество и администрација и Кабинетот на Заменикот на претседателот на Владата задолжен за економски прашања и координација на економските ресори и инвестиции. Крајни корисници се институциите чии услуги и регистри ќе се дигитализираат:

Министерство за внатрешни работи;
Министерство за економија;
Министерство за правда;
Министерство за животна средина и просторно планирање;
Министерство за здравство;
Министерство за труд и социјална политика;
Министерство за транспорт и врски;
Министерство за земјоделство, шумарство и водостопанство;
Агенција за катастар на недвижности;
Агенција за вработување;
Агенција за енергетика;
Регулаторна комисија за енергетика и водни услуги;
Агенција за храна и ветеринарство;
Институт за акредитација;
Управа за водење на матични книги;
Фонд за пензиско и инвалидско осигурување;
Фармацевтска комора.

Дигитализираните услуги ќе бидат достапни на Националниот портал за електронски услуги uslugi.gov.mk [2], додека за дигитализација на регистрите во рамки на проектот се работи на развој на ново решение, еСИР [3].